生活忙碌，搭車難免小睡片刻。但近日有港鐵乘客疑瞓過龍，當列車到終點站時仍未起身，車長遂「大開金口」，大嗌︰「夠鐘喇！起身喇」！
片段於星期四（31日）上傳至Facebook群組「巴打絲打 Facebook Club」，在港鐵北角站內有列車打開門停在月台，有乘客疑在車廂內熟睡，僅餘寥寥數人的月台不斷傳來疑似車長的廣播︰「好早咋，十點半喇，唔好瞓喇喂！喂！喂！到站喇，起身喇，喂」。
月台隨後亦「配合」地再發廣播︰「列車已經到達終點站，請盡快離開車廂，多謝合作」，惟車廂內仍未見動靜。
網民紛紛表示搞笑，戲言︰「好似老竇叫仔起身返學咁」、「錄低佢做鬧鐘響聲，包醒」。有人則稱讚事件有「人情味」︰「證明車長係有血有肉，唔係冷冰冰嘅地鐵」。
---------------
《港呢啲》：大事小事騎呢事，東網嚴謹選題，輕鬆製作！
